Infosys Layoffs | आयटी क्षेत्रातील (IT Sector) मोठी कंपनी असलेल्या इन्फोसिसने (Infosys) अंतर्गत मूल्यांकनात (Internal Assessment) उत्तीर्ण न होऊ शकलेल्या 240 नवीन कर्मचाऱ्यांना (Entry-Level Employees) कामावरून काढण्याचा निर्णय घेतला आहे.
१८ एप्रिल रोजी कंपनीने ईमेलद्वारे (Email) ही माहिती कर्मचाऱ्यांना दिली. यापूर्वी फेब्रुवारी महिन्यातही कंपनीने याच कारणामुळे ३०० हून अधिक प्रशिक्षणार्थींना कामावरून काढले होते. मात्र, इन्फोसिसने या कर्मचाऱ्यांसाठी एनआयआयटी (NIIT) आणि अपग्रेडच्या (UpGrad) माध्यमातून मोफत कौशल्य विकास कार्यक्रमांची (Upskilling Programs) सोय उपलब्ध करून दिली आहे.
इन्फोसिसमधील ही कर्मचारी कपात मागणीतील (Demand) घट झाल्यामुळे झाली आहे. कंपनीने त्यांच्या चौथ्या तिमाहीच्या निकालाची घोषणा करताना, आर्थिक वर्ष २०२६ साठी स्थिर चलन दरात महसूल वाढीचा (Revenue Growth Guidance) अंदाज ०-३ टक्क्यांपर्यंत कमी केला आहे. डिसेंबर तिमाहीत हा अंदाज ४.५ ते ५ टक्के इतका वर्तवण्यात आला होता.
ईमेलमध्ये नमूद केले आहे की, “तुमच्या अंतिम मूल्यांकन प्रयत्नाच्या निकालाच्या घोषणेनंतर, तुम्हाला कळवण्यात येत आहे की अतिरिक्त तयारीचा वेळ, शंका निवारण सत्रे, अनेक मॉक मूल्यांकन आणि तीन प्रयत्नांनंतरही तुम्ही ‘जेनेरिक फाउंडेशन ट्रेनिंग प्रोग्राम’ मध्ये पात्रता निकष पूर्ण केलेले नाहीत. त्यामुळे, तुम्ही अप्रेंटिसशिप कार्यक्रमासाठी तुमचा पुढील प्रवास सुरू ठेवू शकणार नाही.”
ईमेलमध्ये पुढे असेही नमूद केले आहे की, “तुम्ही इन्फोसिसच्या बाहेर संधी शोधत असताना, त्या प्रवासात मदत करण्यासाठी आम्ही व्यावसायिक आऊटप्लेसमेंट सेवांची (योजना आखली आहे. तसेच, बीपीएम (BPM) उद्योगातील संभाव्य भूमिकांसाठी तयारी करण्यासाठी इन्फोसिस प्रायोजित बाह्य प्रशिक्षण घेऊन आम्ही तुम्हाला करिअरचा आणखी एक मार्ग देऊ इच्छितो. प्रशिक्षण यशस्वीरित्या पूर्ण झाल्यावर, तुम्ही इन्फोसिस बीपीएम लिमिटेडमधील उपलब्ध संधींसाठी अर्ज करू शकता. तथापि, जर तुम्हाला तुमचे आयटी कौशल्ये अधिक विकसित करायची असतील, तर तुमच्या आयटी करिअरच्या प्रवासाला अधिक आधार देण्यासाठी इन्फोसिस प्रायोजित आयटी फंडामेंटल्स प्रशिक्षण कार्यक्रम निवडण्याचा पर्यायही तुमच्याकडे आहे.”
याव्यतिरिक्त, प्रशिक्षणार्थींना एक महिन्याचा पगार, निवास आणि म्हैसूरमधील प्रशिक्षण केंद्रापासून बंगळूरु किंवा त्यांच्या मूळ गावी जाण्यासाठी प्रवास भत्ता (Travel Allowance) मिळणार आहे. इन्फोसिसने बीपीएम प्रशिक्षणासाठी अपग्रेड आणि आयटी प्रशिक्षणासाठी एनआयआयटीसोबत भागीदारी केली आहे. फेब्रुवारीमध्ये बाधित झालेल्या प्रशिक्षणार्थींनाही आता हे मोफत कौशल्य विकास अभ्यासक्रम निवडण्याचा पर्याय उपलब्ध करून देण्यात आला आहे.
रिपोर्टनुसार, १७ एप्रिल २०२५ रोजी, २१ ऑक्टोबर २०२४ रोजी जॉईन झालेल्या बॅचमधील सुमारे ७३० प्रशिक्षणार्थींनी त्यांच्या तिसऱ्या आणि अंतिम प्रयत्नाची परीक्षा दिली. पुढील आठवड्यात तिसऱ्या प्रयत्नाची परीक्षा देणाऱ्या प्रशिक्षणार्थींच्या पुढील बॅचचे निकाल अपेक्षित आहेत.
यापूर्वी २६ मार्च रोजी, इन्फोसिसने म्हैसूर कॅम्पसमधील ३०-४५ प्रशिक्षणार्थींना अंतर्गत मूल्यांकनात नापास झाल्यामुळे कामावरून काढले होते आणि त्यांना इन्फोसिस बिझनेस प्रोसेस मॅनेजमेंटमधील (Infosys Business Process Management – BPM) संभाव्य भूमिकांसाठी १२ आठवड्यांच्या प्रशिक्षणासह असाच पर्यायी करिअर मार्ग देऊ केला होता. हे प्रशिक्षणार्थी सिस्टीम इंजिनिअर (System Engineers – SE) आणि डिजिटल स्पेशलिस्ट इंजिनिअर (Digital Specialist Engineers – DSE) म्हणून भरती झाले होते.
कंपनीच्या चौथ्या तिमाहीच्या निकालाच्या पत्रकार परिषदेत बोलताना, इन्फोसिसने सांगितले की, अमेरिका आणि युरोपसारख्या प्रमुख बाजारपेठांमधील अनिश्चिततेचा सामना करत असतानाही, या आर्थिक वर्षात २०,००० फ्रेशर्सची भरती करण्याची योजना आहे. गेल्या वर्षी कंपनीने १५,००० हून अधिक फ्रेशर्सची भरती केली होती.
