Rishabh Pant Records | इंग्लंडविरुद्धच्या पहिल्या कसोटी सामन्यात भारताचा यष्टीरक्षक ऋषभ पंतने (Rishabh Pant) जबरदस्त कामगिरी करत अनेक विक्रम आपल्या नावावर केले आहेत. हेडिंग्ले कसोटीत (Headingley Test) इंग्लंडविरुद्ध दोन्ही डावांत शतके झळकावत ऋषभने इतिहास रचला आहे.
पहिल्या डावात 134 आणि दुसऱ्या डावात 118 धावांसह त्याने अनेक विक्रम (Rishabh Pant Records) नावावर केले. इंग्लंडमध्ये कसोटीच्या दोन्ही डावांत शतके ठोकणारा तो पहिला भारतीय फलंदाज ठरला आहे.
हेडिंग्ले कसोटीतील शानदार कामगिरी
पंतने हेडिंग्ले कसोटीच्या पहिल्या डावात 134 धावांची शानदार खेळी केली, तर चौथ्या दिवशी दुसऱ्या डावात 118 धावांची खणखणीत खेळी साकारली. यासह, तो एका कसोटी सामन्यात दोन्ही डावांत शतके ठोकणारा जगातील दुसरा यष्टीरक्षक-फलंदाज ठरला. यापूर्वी 2001 मध्ये झिम्बाब्वेच्या अँडी फ्लॉवरने दक्षिण आफ्रिकेविरुद्ध 141 आणि नाबाद 199 धावांसह हा पराक्रम केला होता.
पंतचे विक्रम
इंग्लंडमध्ये दोन्ही डावांत शतक: पंत हा इंग्लंडमध्ये एकाच कसोटीत दोन्ही डावांत शतके ठोकणारा पहिला भारतीय फलंदाज आहे. याआधी विजय हजारे, सुनील गावस्कर, राहुल द्रविड, विराट कोहली, अजिंक्य रहाणे आणि रोहित शर्मा यांनी कसोटीच्या दोन्ही डावांत शतके केली आहेत.
परदेशी फलंदाजांमध्ये नववा: 2019 मध्ये स्टीव्ह स्मिथने ही कामगिरी केल्यापासून, तो दोन्ही डावांत शतक ठोकणारा नववा परदेशी फलंदाज आहे.
भारतीय यष्टीरक्षकाचा विक्रम: पंतने दोन्ही डावांत 252 धावा केल्या, जो भारतीय यष्टीरक्षकाने एका कसोटीत केलेला सर्वाधिक धावसंख्येचा विक्रम आहे. यापूर्वी 1964 मध्ये बुधी कुंदरनने 230 धावा केल्या होत्या.
आठवे कसोटी शतक: हे पंतचे आठवे कसोटी शतक आहे. यष्टीरक्षकांमध्ये ॲडम गिलख्रिस्ट (17) आणि अँडी फ्लॉवर (12) त्याच्या पुढे आहेत. इंग्लंडच्या लेस एम्स यांनीही आठ शतके केली आहेत.
इंग्लंडमधील सर्वाधिक शतके: पंतने इंग्लंडमध्ये चार कसोटी शतके केली असून, यष्टीरक्षकांमध्ये ॲलेक स्टुअर्ट आणि मॅट प्रायर यांच्याशी बरोबरी साधली आहे. परदेशी यष्टीरक्षकांमध्ये ही सर्वाधिक शतके आहेत.
