मुंबई – नॅशनल पेमेंटस् कॉर्पोरेशन ऑफ इंडिया (NPCI) या सरकारी संस्थेने वांद्रे-कुर्ला संकुलातील (BKC) मोक्याच्या स्थळी असलेला भूखंड मुंबई महानगर प्रदेश विकास प्राधिकरणाकडून (एमएमआरडीए) ८२९ कोटी रुपयांमध्ये ८० वर्षांच्या भाडेपट्टीवर घेतला आहे. या भूखंडावर एनपीसीआयचे नवीन मुख्यालय उभारण्यात येणार आहे.
बीकेसीच्या जी ब्लॉकमधील सी-४४ आणि सी-४८ या भूखंडांवर राष्ट्रीय पेमेंट्स कॉर्पोरेशन ऑफ इंडिया (NPCI) १६ मजली इमारत उभारण्याच्या तयारीत आहे. या दोन्ही भूखंडांचे एकत्रित क्षेत्रफळ सुमारे ६ हजार चौरस मीटर असून, त्यावर कमाल २४,०७६ चौरस मीटरचे बांधकाम करता येणार आहे. ही प्रस्तावित इमारत अत्याधुनिक असून, चार ते पाच मजले बेसमेंट पार्किंगसाठी राखीव असतील. त्यामुळे या भूखंडाचा जास्तीत जास्त वापर करण्यासाठी एनपीसीआयला वाढीव एफएसआय (फ्लोअर स्पेस इंडेक्स) आवश्यक पडण्याची शक्यता आहे.
देशात डिजिटल व्यवहारांमध्ये झपाट्याने वाढ झाल्याने यूपीआय (UPI), रुपे (RuPay) यांसारख्या प्रणालीद्वारे होणाऱ्या आर्थिक व्यवहारांचे नियमन करण्याची जबाबदारी एनपीसीआयवर आहे. डिजिटल क्रांतीच्या युगात या संस्थेची भौतिक पायाभूत सुविधा मजबूत करणे अपरिहार्य बनले आहे. त्यामुळेच बीकेसीमधील या महत्त्वाच्या ठिकाणी एनपीसीआय आपले प्रमुख कार्यालय निर्माण करत आहे.
