BMC Elections Marathi Vote Bank : राज्यातील सर्वात महत्त्वाची मानली जाणारी मुंबई महानगरपालिकेची निवडणूक अखेर जाहीर झाली आहे. निवडणुकांच्या तारखा समोर येताच मुंबईतील प्रत्येक प्रभागात हालचालींना प्रचंड वेग आला असून राजकीय वातावरण चांगलेच तापू लागले आहे.
१५ डिसेंबरपासून शहरात आचारसंहिता लागू झाल्याने आता अधिकृत प्रचारावर काही बंधने आली आहेत. अशा परिस्थितीत मतदारांपर्यंत पोहोचण्यासाठी आणि विशेषतः मराठी जनमत आपल्या बाजूने वळवण्यासाठी विविध मार्गांचा अवलंब केला जात आहे. मुंबईच्या सत्तेची किल्ली मराठी मतदारांच्या हातात असल्याने, सर्वच राजकीय गटांनी या वर्गाला आकर्षित करण्यासाठी आपली पूर्ण ताकद पणाला लावली आहे.
शहरातील प्रमुख चौकांमध्ये आता राजकीय जाहिराती आणि बॅनरचा सुळसुळाट पाहायला मिळत आहे. प्रत्येक पक्ष आपले अस्तित्व सिद्ध करण्यासाठी आणि मराठी माणसाचा कैवारी आपणच आहोत, हे दाखवण्यासाठी मैदानात उतरला आहे. निवडणुका जाहीर झाल्यापासून मुंबईतील राजकीय समीकरणे वेगाने बदलू लागली आहेत.
बॅनरच्या माध्यमातून भावनिक साद आणि सूचक संदेश
प्रचारावर असलेल्या मर्यादा लक्षात घेऊन आता मुंबईत जागोजागी सूचक संदेश देणारे फलक लावण्यात आले आहेत. सुरुवातीला दक्षिण मुंबईच्या काही भागांत दिसणारे हे फलक आता थेट उपनगरांपर्यंत पोहोचले आहेत. या फलकांवरून मराठी माणसाला एकत्र येण्याचे आणि आपल्या हक्कांसाठी लढण्याचे आवाहन केले जात आहे. “रात्र वैऱ्याची आहे” आणि “मुंबई वाचवण्यासाठी एकत्र या” अशा आशयाचे संदेश या फलकांवरून दिले जात आहेत, जे मुंबईतील मराठी मतदारांच्या मनात घर करण्याचा प्रयत्न करत आहेत.
गेल्या काही काळापासून मुंबईत विविध कारणांमुळे भाषिक वादाच्या ठिणग्या पडताना दिसत आहेत. विल्सन जिमखाना प्रकरण किंवा काही भूखंडांच्या वाटपावरून स्थानिक मराठी नागरिकांमध्ये नाराजीचा सूर आहे. हीच नाराजी आता मतदानातून व्यक्त व्हावी, यासाठी काही सामाजिक संस्था आणि राजकीय गट सक्रिय झाले आहेत. मुंबईचे भौगोलिक आणि सांस्कृतिक स्वरूप बदलत असल्याची भीती व्यक्त करत मराठी माणसाला भावनिक साद घातली जात आहे.
स्थानिक प्रश्नांची धार आणि आंदोलनाचे पडसाद
दक्षिण मुंबईतील अनेक महत्त्वाचे भूखंड आणि संस्थांवरील कब्जा हा सध्या कळीचा मुद्दा बनला आहे. कफ परेडमधील जागा असो वा ससून डॉकचे प्रश्न, या सर्वांवरून स्थानिक संस्था आक्रमक झाल्या आहेत. आम्ही गिरगांवकर सारख्या संस्थांनी पुढाकार घेऊन लावलेले फलक सध्या मुंबईकरांच्या चर्चेचा विषय ठरले आहेत.
मराठी माणसाच्या हक्काच्या जागांवर अतिक्रमण होत असल्याचा दावा करत, या निवडणुका ही अस्तित्वाची शेवटची लढाई असल्याचे चित्र उभे केले जात आहे. निवडणुकांच्या या धामधुमीत आता विकासकामांपेक्षा अस्मितेचे मुद्दे अधिक प्रभावी ठरू लागल्याने, मुंबई महापालिकेची ही लढत अत्यंत चुरशीची आणि ऐतिहासिक होण्याची चिन्हे आहेत.
हे देखील वाचा – Manikrao Kokate : माणिकराव कोकाटेंची आमदारकी आणि मंत्रिपद धोक्यात; सदनिका घोटाळ्यात 2 वर्षांची शिक्षा कायम
