Solapur News : निवडणुकांच्या पार्शवभूमीवर तळागाळातील कार्यकर्ते सक्रिय होताना दिसत आहेत. यालाच धरून सोलापूर महापालिका निवडणुकीत उमेदवारी मिळावी म्हणून भाजपचे निष्ठावंत कार्यकर्ते अनंत धुम्मा यांनी पक्षाला थेट इशाराच दिल्याची बातमी समोर येत आहे. तिकीट न मिळाल्यास टोकाचे पाऊल उचलण्याची धमकी त्यांनी पक्षाला दिली आहे.
राज्यात सध्या महापालिका निवडणुकीवरुन गरमागर्मीचे वातावरण आहे. सध्या सत्ताधारी आणि विरोधी दोन्हीही पक्षात तिकीट मिळवण्यासाठी जोरदार लॉबिंग सुरु असल्याचे देखील दिसत आहे. त्यातच आगामी सोलापूर महानगरपालिकेत निवडणुकीच्या तिकीट वाटपावरून भाजपमध्ये अंतर्गत कुरघोडी असल्याचे दिसून येत आहे.
मागच्या ४० वर्षांपासून पक्षाशी एकनिष्ठ असलेले कार्यकर्ते अनंत धुम्मा यांनी उमेदवारीसाठी थेट पक्षनेत्यांनाच इशारा दिल्याची माहिती आहे. मला उमेदवारी मिळायलाच हवी, अन्यथा माझ्या जीवाचे बरे-वाईट झाल्यास त्याला पक्ष जबाबदार असेल,” असे धक्कादायक विधान अनंत धुम्मा यांनी केले आहे.
नेमकं प्रकरण काय?
सोलापूर महानगरपालिकेच्या १०२ जागांसाठी भाजपकडून इच्छुकांची मोठी गर्दी झाल्याचे दिसून येत आहे. तब्बल १२०० हून अधिक कार्यकर्त्यांनी उमेदवारीसाठी अर्ज दाखल केले असून यामध्ये जुन्या आणि निष्ठावंत कार्यकर्त्यांना डावलले जाण्याची भीती मोठ्या प्रमाणावर व्यक्त केली जात आहे. अनंत धुम्मा हे ,मागच्या चार दशकांपासून भाजपचे काम करत आहेत. आणि यावेळी सोलापूर महापालिका निवडणुकीसाठी त्यांना संधी मिळावी यासाठी ते आग्रही आहेत. त्यांचा एक व्हिडीओदेखील सोशल मीडियावर प्रचंड व्हायरल होत आहे. त्यामध्ये त्यांनी आत्महत्येसारखं मोठं पाऊल उचलण्याचा इशारा दिल्याचे दिसून येत आहे.
ते म्हणतात मी मागच्या ४० वर्षांपासून भाजपासाठी कार्यरत आहे. हा पक्ष स्थापन झाल्यापासून मी या पक्षासाठी काम करतो आहे. भाजप पक्षावर विश्वास ठेवूनच मी पक्षाचे काम अगदी निष्ठेने करत आहे. मला यावेळी १०० टक्के न्याय मिळावा, असे मला वाटत आहे. तसेच मी भाजपला सांगू इच्छितो की माझ्यासारख्या निष्ठावंत कार्यकर्त्यासोबत जर तुम्ही चुकीचं करत असाल आणि यामध्ये माझ्या जीवाचं जर काही बरं-वाईट झालं तर त्याला मी जबाबदार नसिन, असे अनंत धुम्मा म्हणाले.
मी इतके वर्ष काम करत आहे. मी नगरसेवक नसतानाही एक कार्यकर्ता म्हणून आज केंद्राच्या योजना, तसेच राज्य सरकारच्या योजना घराघरात पोहोचवल्या आहेत. आणि इतकं सगळं काम करुन जर आम्हाला न्याय मिळत नसेल तर स्वत:ला काहीतरी करुन घेण्याशिवाय माझ्याकडे दुसरा पर्याय नाही. जे निष्ठावंत आहेत, जे काम करतात त्यांना १०० टक्के न्याय देण्याचा प्रयत्न करण्याचे आव्हान देखील अनंत धुम्मा यांनी केले आहे.परंतु; व्हिडीओ व्हायरल झाल्यानंतर त्यांनी आपण हे विधान भावनेच्या भरात केल्याचे स्पष्ट केले आहे.
दरम्यान या सर्व प्रकरणावर भाजप शहराध्यक्षा रोहिणी तडवळकर यांनी सावध प्रतिक्रिया दिली आहे. सर्वच कार्यकर्त्यांना आपल्याला न्याय मिळावा असेच वाटत असते मात्र पक्षाला देखील काही निर्णय विचारपूर्वक घ्यावे लागतात, असे सांगत त्यांनी जुन्या आणि नव्या कार्यकर्त्यांना सर्व गोष्टी सबुरीने घेण्याचा सल्ला दिला आहे. तसेच, कोणत्याही कार्यकर्त्यांने कायदा हातात घेऊन शहराचे वातावरण बिघडवू नये, असे आवाहन देखील रोहिणी तडवळकर यांनी केले आहे. यामुळे उमेदवारी वाटप करताना भाजपसमोर निष्ठावंतांना सांभाळण्याचे मोठे आव्हान असल्याचे दिसून येत आहे.
हे देखील वाचा – Electric Cars: डिझेल-पेट्रोलचे टेन्शन सोडा! 7 लाखांच्या बजेटमध्ये घरी न्या इलेक्ट्रिक कार; पाहा टॉप 3 स्वस्त पर्याय
