Bank Official Stole Crores From FDs | बँक म्हणजे आपल्या पैशांसाठी सर्वात सुरक्षित ठिकाण, अशी सर्वसामान्य धारणा असते. मात्र, राजस्थानमधील कोटा शहरातून समोर आलेल्या एका धक्कादायक प्रकरणाने बँकेतील सुरक्षिततेवरच प्रश्नचिन्ह उभं केलं आहे. आयसीआयसीआय बँकेच्या एका महिला रिलेशनशीप मॅनेजरने सुमारे 4.58 कोटी रुपयांची फसवणूक केल्याचे उघड झाले असून, पोलिसांनी तिला अटक केली आहे.
साक्षी गुप्ता (Sakshi Gupta) ही महिला बँक अधिकारी 2020 ते 2023 या कालावधीत कोटा येथील श्रीराम नगर शाखेत कार्यरत होती. उच्च परतावा मिळण्याच्या आशेने तिने बँक खातेधारकांचेच पैसे शेअर बाजारात लावले होते. या घटनेत जळपास 41 ग्राहकांची फसवणूक झाली आहे. गुप्ताने ग्राहकांच्या एफडी खात्यांमध्ये अनधिकृत प्रवेश करून, त्यांचे पैसे स्वतःच्या खात्यांत वळवले आणि शेअर बाजारात गुंतवले. मात्र तिची योजना अपयशी ठरली आणि मोठे नुकसान झाल्यामुळे ती हे पैसे परत करू शकली नाही.
बँक कर्मचाऱ्याने 4.58 कोटी कसे लाटले?
साक्षी गुप्ताने 2020 ते 2023 या काळात ‘यूझर एफडी (फिक्स्ड डिपॉझिट)’ या सुविधेचा गैरवापर करत 41 ग्राहकांच्या 110 हून अधिक खात्यांचा वापर करत बेकायदेशीर व्यवहार केले. तपासादरम्यान असे दिसून आले की, आयसीआयसीआय बँकेच्या या कर्मचाऱ्याने अल्पावधीत चांगला परतावा मिळवण्याच्या आशेने हे पैसे शेअर बाजारात गुंतवले. ग्राहकांना आपले पैसे काढले जात असल्याची कोणतीही कल्पना नसताना, दोन वर्षांहून अधिक काळ ही फसवणूक सुरू होती.
मात्र, गुप्ताची योजना फोल ठरली. तिला शेअर बाजारात मोठे नुकसान झाले. यामुळे ती पैसे गमावून बसली आणि अखेरीस ग्राहकांच्या खात्यात ते पैसे परत जमा करण्यात अयशस्वी ठरली. फसवणूक लपवण्यासाठी, तिने खात्यांशी जोडलेले फोन नंबर बदलले, जेणेकरून ग्राहकांना व्यवहारांबद्दल माहिती मिळणार नाही.
या सगळ्या प्रकरणाचा खुलासा एका ग्राहकाच्या एफडी तपासणीच्या वेळी झाला. 18 फेब्रुवारी 2023 रोजी बँकेने पोलिसांत तक्रार दाखल केली. तपासादरम्यान एकूण 110 हून अधिक बँक खात्यांत अनधिकृत व्यवहार झाले असल्याचे समोर आले.
पोलिसांनी माहिती दिली की, तिने आपल्या कुटुंबातील सदस्यांचे फोन नंबर या खात्यांशी जोडले आणि 4 कोटींहून अधिक रुपये काढले. खातेदारांना फसवणुकीचा सुगावा लागू नये यासाठी तिने एक प्रणाली तयार केली होती, ज्यामुळे तिला तिच्या सिस्टीमवर ओटीपी (OTP) मिळत होते. गुप्ताने एका वृद्ध महिलेच्या खात्याचा वापर केला आणि तिच्या नकळत त्यातून 3 कोटी रुपये काढले.
या घोटाळ्याची गंभीर दखल घेत आयसीआयसीआय बँकेने तात्काळ एफआयआर दाखल केला. बँकेच्या प्रवक्त्यानुसार, “ग्राहकांचा विश्वास आणि सुरक्षा हे आमचं सर्वोच्च प्राधान्य आहे. संबंधित कर्मचाऱ्याला निलंबित करण्यात आले असून, सर्व ग्राहकांच्या दाव्यांचा निपटारा करण्यात आला आहे.”
