Gopal Das IIM Bangalore: इंडियन इन्स्टिट्यूट ऑफ मॅनेजमेंट बंगळूरु (IIMB) येथील मार्केटिंगचे सहयोगी प्राध्यापक गोपाल दास यांनी जागतिक स्तरावर मार्केटिंग संशोधकांमध्ये आपले नाव कोरले आहे.
मार्केटिंग बिग15 यूएसएने जाहीर केलेल्या ऑगस्ट महिन्याच्या क्रमवारीत त्यांना भारतात 1 तर आशियामध्ये 2 आणि जगभरात 17 वे स्थान मिळाले आहे. 2018 ते 2025 या काळात त्यांच्या कार्यासाठी त्यांना हा सन्मान मिळाला आहे.
द मूकनायकच्या रिपोर्टनुसार, या विशेष जागतिक यादीतील ते एकमेव भारतीय आहेत. या सन्मानामुळे त्यांनी IIMB सह भारताची जागतिक शैक्षणिक पातळीवर प्रतिष्ठा वाढवली आहे. गेल्या पाच वर्षांपासून ते स्टॅनफोर्ड विद्यापीठाच्या जगातील टॉप 2% शास्त्रज्ञांच्या यादीतही स्थान मिळवत आहेत.
जागतिक यश आणि जातीभेदाचा अनुभव
प्राध्यापक दास यांचे हे जागतिक यश खूप महत्त्वाचे आहे, कारण काही महिन्यांपूर्वी त्यांना याच संस्थेमध्ये जातीवर आधारित अपमानाचा अनुभव आला होता. अनुसूचित जाती (SC) समाजाचे सदस्य असलेले प्राध्यापक दास यांनी संस्थेतील काही जणांनी त्यांच्यावर पद्धतशीरपणे बहिष्कार टाकून त्रास दिल्याचे आरोप केले होते.
जून 2024 मध्ये त्यांनी राष्ट्रपती द्रौपदी मुर्मू यांच्याकडे एक तक्रार दाखल केली. त्यात त्यांनी संस्थेच्या तत्कालीन संचालक आणि इतर प्राध्यापकांवर जातीवरून अपमान, त्रास देणे आणि समान संधी नाकारण्याचा आरोप केला होता.
यानंतर कर्नाटक सरकारच्या नागरिक हक्क अंमलबजावणी संचालनालयाने (DCRE) या प्रकरणाची चौकशी केली. डिसेंबर 2024 मध्ये सादर झालेल्या अहवालात त्यांना जातीभेदातून ‘अपमान’ आणि ‘बहिष्काराचा’ सामना करावा लागल्याचे समोर आले. या अहवालानंतर बेंगळूरु पोलिसांनी गुन्हाही दाखल केला होता. मात्र, संस्थेने हे आरोप निराधार असल्याचे म्हटले होते.
आजही हे प्रकरण पूर्णपणे मिटलेले नसले तरी, प्राध्यापक दास यांच्या जागतिक यशाने IIM सारख्या उच्च शिक्षण संस्थांमधील जातीभेदाच्या प्रश्नावर पुन्हा एकदा चर्चा सुरू झाली आहे.
ताज्या बातम्यांसाठी येथे क्लिक करून नवाकाळचे WhatsApp Channel फॉलो करा
हे देखील वाचा – कुणबी प्रमाणपत्र कसे काढायचे? जाणून घ्या प्रोसेस
