नेदरलँड्समध्ये पुन्हा राजकीय अस्थिरता, अवघ्या काही महिन्यात पुन्हा सरकार पुन्हा कोसळले, कारण काय? 

Netherlands Government Collapse | नेदरलँड्समध्ये (Netherlands) पुन्हा एकदा सरकार कोसळले आहे. अति-उजव्या विचारसरणीचे नेते गीर्ट वाइल्डर्स (Geert Wilders) यांनी त्यांच्या पक्षाचा पाठिंबा युती सरकारमधून काढून घेतला, ज्यामुळे ही परिस्थिती उद्भवली. ही घटना जुलै 2023 मध्ये घडलेल्या घटनेची पुनरावृत्ती आहे. सरकार कोसळल्यानंतर पंतप्रधान डिक शूफ (Dick Schoof) यांनी सांगितले की, त्यांचे प्रशासन “काळजीवाहू सरकार” म्हणून काम करत राहील.

पीव्हीव्ही युतीतून बाहेर

वाइल्डर्स यांनी एक्स (X) या सोशल मीडिया प्लॅटफॉर्मवर घोषणा केली की, त्यांचा पीव्हीव्ही (Freedom Party) पक्ष युतीतून बाहेर पडत आहे.

पत्रकारांशी बोलताना, 2023 च्या अचानक झालेल्या निवडणुकीत विजयी झालेल्या वाइल्डर्स यांनी सांगितले की, त्यांच्या पक्षाने कठोर आश्रय धोरणावर (strict asylum policy) स्वाक्षरी केली होती, पण नेदरलँड्सच्या पतनासाठी नव्हे. पीव्हीव्हीच्या बाहेर पडल्यामुळे संसदेतील 150 पैकी फक्त 51 जागा उरल्या आहेत.

डिक शूफ यांचे काळजीवाहू सरकार

सरकार कोसळल्यानंतर पंतप्रधान डिक शूफ यांनी त्यांच्या युती सरकारला काळजीवाहू प्रशासन घोषित केले. त्यांनी पत्रकारांना सांगितले की, वाइल्डर्स यांच्या फ्रीडम पार्टीच्या मंत्र्यांचा राजीनामा डच राजाला सादर करण्यात येईल. या परिस्थितीमुळे, नेदरलँड्स जूनच्या अखेरीस नाटो 2025 शिखर परिषदेचे आयोजन काळजीवाहू प्रशासनाच्या अंतर्गत करेल.

डच सरकार पुन्हा का कोसळले?

ही 2023 मधील घटनेची पुनरावृत्ती होत असून, स्थलांतराच्या मुद्यावर झालेल्या मतभेदांमुळे सरकार कोसळले आहे. जुलै 2023 मध्ये तत्कालीन पंतप्रधान मार्क रुटे यांनी नेदरलँड्सच्या स्थलांतर धोरणावरील मतभेदांमुळे सरकार कोसळल्याचे घोषित केले होते. त्यानंतर नोव्हेंबर 2023 मध्ये नवीन निवडणुका झाल्या आणि वाइल्डर्स यांच्या पार्टी फॉर फ्रीडमने विजय मिळवला.

मात्र, वाइल्डर्स यांनी पंतप्रधानपदासाठी निवडणूक लढवली नाही. त्यांनी पीपल्स पार्टी फॉर फ्रीडम अँड डेमोक्रसी (VVD), न्यू सोशल कॉन्ट्रॅक्ट (NSC) आणि फार्मर-सिटिझन मूव्हमेंट (BBB) यांच्यासोबत युती करून सरकार स्थापन केले होते.