Ambernath Election 2025 : राज्यात आज २३ नगरपरिषदा आणि नगरपंचायतींसह विविध जिल्ह्यांतील एकूण १४३ सदस्यपदांसाठी मतदान प्रक्रिया पार पडत आहे. सकाळी ७:३० ते सायंकाळी ५:३० या वेळेत मतदान पार पडणार आहे. राज्यातील अनेक मतदान केंद्रावर सकाळपासूनच मतदारांनी मोठ्या रांगा लावल्याचे पाहायला मिळत आहे.
राज्यात मागच्या काही काळापासून बोगस मतदारांचा मुद्दा वाढताना दिसत आहे. आणि आता अशातच अंबरनाथच्या (Ambernath Election 2025) कोहोजगाव परिसरातुन देखील याच संदर्भातील एक खळबळ उडवणारी बातमी समोर आली आहे. मतदानासाठी शेकडो महिलांची एका सभागृहात गर्दी जमली असून हे मतदार बोगस (Bogus Voters in Ambernath) असल्याचा खळबळजनक आरोप राजकीय पक्षांनी आरोप केला आहे. या प्रकरणानंतर काँग्रेस आणि भाजपचे कार्यकर्ते घटनास्थळी दाखल झाले असून वातावरण अधिक तापले असल्याचे दिसून आले.
अंबरनाथच्या कोहोजगाव परिसरात सभागृहामध्ये मोठ्या प्रमाणात पहाटेच्या सुमारास महिला आणि पुरुष एकत्र जमले होते. हे सगळे लोक बोगस मतदान करण्यासाठी आणले असल्याचा आरोप काँग्रेस आणि भाजपच्या कार्यकर्त्यांनी केला आहे.
दरम्यान काँग्रेस आणि भाजप कार्यकर्ते घटनास्थळी पोहोचले आणि त्यांनी इथे गोंधळ घालण्यास सुरवात केली, या महिला बोगस मतदान करण्यासाठी प्रतिस्पर्धी उमेदवाराने आणल्याचा आरोप काँग्रेस कार्यकर्त्यांन कडून करण्यात आला आहे.
या संदर्भात पोलिसांना माहिती दिल्यानंतर त्यांनी या सभागृहातील महिलांना बाहेर काढले. या महिला कुठून आल्या आणि खरंच या बोगस मतदान करण्यासाठी आल्या होत्या का? याची चौकशी सुरु असल्याची माहिती सध्या आहे.
दरम्यान या प्रकरणात पोलिसांनी अधिक माहिती दिली आहे. या प्रकरणाची खात्री-पडताळणी सुरू असल्याचे पोलिसांनी सांगितले. मोठ्या प्रमाणात जमा झालेल्या महिला आणि त्यांचं तिथे असण्याचं कारण याचा तपास सुरु आहे. मात्र हे लोक स्थानिक नागरिक नाहीत. एकूण २०८ महिला आणि मुलं यामध्ये समाविष्ट आहेत. सगळेच भिवंडीवरून आले असल्याची प्राथमिक माहिती आहे. फिरती पथकाकडून तपास सुरू असल्याचे देखील त्यांनी सांगितले. लवकरच या प्रकरणाची माहिती समोर येईल असा विश्वास देखील अंबरनाथ पोलिसांनी दाखवला आहे.
अंबरनाथ शहरातील प्रभाग क्रमांक २८ मध्ये दोन जणांना पैशाची पॉकिट वाटत असताना राष्ट्रवादी काँग्रेसच्या अजित पवार गटाच्या कार्यकर्त्यांनी रंगेहाथ पकडले आहे. त्यानंतर या दोन जणांना राष्ट्रवादी काँग्रेस अजित पवार गटाच्या कार्यकर्त्यांनी भरारी पथकाच्या ताब्यात देण्यात आले. सध्या घटनास्थळी पोलीस दाखल झाले असून पुढील तपास सुरु आहे. भाजपच्या उमेदवाराकडून हे पैसे वाटप करत असल्याचा खळबळजनक आरोप शिंदे गटाच्या कार्यकर्त्यांनी केला आहे.शिंदेच्या शिवसेनेच्या आरोपानंतर परिसरात काही काळ तणावाचं वातावरण होत. तसेच कार्यकर्त्यांना पांगवण्यासाठी पोलिसांनी सौम्य लाठीचार्ज देखील करण्यात आला आहे.
हे देखील वाचा – Railway Block : कांदिवली-बोरिवली सहाव्या मार्गिकेसाठी ब्लॉक; ३० दिवसांचा जम्बो मेगाब्लॉक
