Maharashtra Monsoon | महाराष्ट्रात मान्सूनने जोरदार आगमन केले असून, अनेक जिल्ह्यांमध्ये अतिवृष्टीमुळे जनजीवन विस्कळीत झाले आहे. हवामान विभागाने (IMD) मुंबई, पुणे आणि किनारपट्टीसह अनेक जिल्ह्यांमध्ये रेड अलर्ट (Red Alert) जारी करण्यात आला आहे. गेल्या काही दिवसांपासून सुरू असलेल्या मुसळधार पावसामुळे नद्यांना पूर आला असून, अनेक रस्ते पाण्याखाली गेले आहेत.
राज्यातील विविध जिल्ह्यांसाठी हवामान विभागाचा इशारा:
- रेड अलर्ट (अति मुसळधार पाऊस): मुंबई, ठाणे, रायगड, रत्नागिरी, सिंधुदुर्ग, पुणे (घाट क्षेत्र), सातारा (घाट क्षेत्र), कोल्हापूर.
- ऑरेंज अलर्ट (मुसळधार ते अति मुसळधार पाऊस): पालघर, नाशिक, अहमदनगर, पुणे (शहरी भाग), सांगली, सोलापूर, बीड, लातूर, धाराशिव, परभणी, हिंगोली, नांदेड.
- यलो अलर्ट (मुसळधार पाऊस): उर्वरित महाराष्ट्र.
मुंबई आणि पुण्यामध्ये २४ मे रोजी वेळेपेक्षा सुमारे १२ दिवस आधी मान्सूनचे आगमन झाले. त्यानंतर पावसाचा जोर वाढतच गेला. अनेक सखल भागांमध्ये पाणी साचले असून, वाहतूक व्यवस्था कोलमडली आहे. मुंबईतील हिंदमाता, किंग सर्कल, दादर, अंधेरी, वांद्रे यांसारख्या भागांमध्ये पाणी साचल्याने बस सेवा विस्कळीत झाली आहे. मध्य आणि पश्चिम रेल्वेच्या लोकल गाड्याही पावसामुळे उशिराने धावत आहेत. छत्रपती शिवाजी महाराज टर्मिनसबाहेर पाणी साचल्याने प्रवाशांना अडचणींचा सामना करावा लागत आहे.
राज्यात पावसामुळे आतापर्यंत चार जणांचा बळी गेला आहे. पुणे जिल्ह्यात झाड कोसळून आणि वीज पडून तिघांचा मृत्यू झाला, तर विरारमध्ये एका व्यक्तीचा जीव गेला. पुणे जिल्ह्यात अतिवृष्टीमुळे राज्य आपत्ती विभागाने नागरिकांना सतर्क राहण्याचा इशारा दिला आहे.
कोकण आणि पश्चिम महाराष्ट्रात पुढील काही तास जोरदार पाऊस सुरू राहण्याची शक्यता हवामान विभागाने वर्तवली आहे. नागरिकांनी सतर्क राहावे आणि प्रशासनाच्या सूचनांचे पालन करावे, असे आवाहन करण्यात आले आहे.
