Pod Taxi Service: भविष्यातील शहरी वाहतुकीला (Urban Mobility) चालना देण्यासाठी मीरा-भाईंदर (Mira-Bhayandar) शहरात लवकरच पॉड टॅक्सी सेवा सुरू होणार आहे. यामुळे वाहतूक कोंडीची समस्या कमी होऊन दैनंदिन प्रवासात मोठा बदल होण्याची शक्यता आहे.
मेट्रो प्रकल्पांनंतरचा हा एक महत्त्वाचा टप्पा मानला जात आहे. पॉड टॅक्सी एलिवेटेड ट्रॅकवर धावणार असल्यामुळे रस्त्यावरील वाहतुकीचा अडथळा टाळता येईल. यामुळे वेग, सुरक्षा आणि कार्यक्षमता वाढण्यास मदत होईल.
राज्याचे परिवहन मंत्री प्रताप सरनाईक यांनी दिलेल्या माहितीनुसार, या प्रगत वाहतूक प्रणालीचे नियोजन न्यूट्रॉन ईवी (Neutron EV) या कंपनीच्या सहकार्याने केले जात आहे. कंपनीने एप्रिल महिन्यापासूनच मीरा-भाईंदरमध्ये सर्वेक्षण सुरू केले आहे. नुकताच या प्रकल्पाचा सविस्तर अहवाल मंत्र्यांच्या नेतृत्वाखाली सादर करण्यात आला.
सरनाईक म्हणाले, “उपमुख्यमंत्री एकनाथ शिंदे यांच्या नेतृत्वाखाली मीरा-भाईंदरच्या सर्वांगीण विकासासाठी 1,800 कोटींच्या विकास प्रकल्पांना मंजुरी मिळाली आहे. यापैकी 900 कोटी रुपये फक्त रस्त्यांच्या दुरुस्तीसाठी आहेत. याच प्रकल्पांच्या अनुषंगाने आज मीरा-भाईंदर महानगरपालिका (MBMC) मुख्यालयात एक महत्त्वाची बैठक घेण्यात आली. या बैठकीत पॉड टॅक्सी प्रकल्पासह 26 प्रकल्पांचा सविस्तर आढावा घेण्यात आला.”
शहराची लोकसंख्या वेगाने वाढत असल्यामुळे, वेगवान, सुरक्षित आणि पर्यावरणपूरक वाहतुकीचा पर्याय देणे हे यामागचे मुख्य उद्दिष्ट आहे. विशेष म्हणजे, हा प्रकल्प महानगरपालिका किंवा राज्य सरकारवर कोणताही आर्थिक भार न टाकता विकसित केला जाईल. वर्षाच्या अखेरीस या प्रकल्पाचे भूमिपूजन होण्याची शक्यता असल्याचेही सरनाईक यांनी सांगितले.
रिपोर्टनुसार, शहराच्या 33 किमी लांबीच्या मुख्य भागांना मेट्रो आणि रेल्वे स्थानकांशी जोडण्याची गरज आहे. प्रकल्पाच्या पहिल्या टप्प्यात 14 किमीचा मार्ग जेपी इन्फ्रापासून गोल्डन नेस्ट पर्यंत असेल. प्रकल्पाची एकूण अंदाजित किंमत सुमारे 1,000 कोटी आहे, पण सार्वजनिक-खासगी भागीदारी (Public-Private Partnership) मॉडेल अंतर्गत तो राबवला जाणार असल्यामुळे, राज्य सरकार किंवा महानगरपालिकेवर कोणताही आर्थिक भार येणार नाही.
राज्य सरकारकडून आवश्यक मंजुरी मिळाल्यानंतर, मार्च 2026 पर्यंत बांधकाम सुरू होऊन ते दोन वर्षांत पूर्ण होण्याची अपेक्षा आहे.
