Pune city traffic police | पुणे शहर वाहतूक पोलिसांनी (Pune city traffic police) वाहतूक व्यवस्थापन अधिक स्मार्ट आणि कार्यक्षम करण्यासाठी एक अत्याधुनिक तंत्रज्ञान वापरण्याचा निर्णय घेतला आहे. फर्ग्युसन कॉलेज रस्त्यावर आर्टिफिशियल इंटेलिजन्स (Artificial Intelligence) आधारित वाहतूक नियम उल्लंघन शोध प्रणालीचे प्रायोगिक तत्त्वावर परीक्षण सुरू करण्यात आले आहे.
ही प्रणाली वाहतूक उल्लंघन करणाऱ्यांना आपोआप ओळखून त्यांच्यावर कारवाई करण्यास सक्षम आहे. बेकायदेशीर पार्किंग , चुकीच्या दिशेने वाहन चालवणे, आणि नो-पार्किंग झोनमध्ये उभी केलेली वाहने यावर विशेष लक्ष ठेवले जात आहे.
AI प्रणाली थेट CCTV फुटेजचे विश्लेषण करून रिअल-टाइम अलर्ट तयार करते, जे वाहतूक नियंत्रण कक्षाकडेपाठवले जातात. या अलर्टच्या आधारे त्वरित दंड किंवा ई-चलान (e-challans) जारी करता येतात, आणि त्यासाठी कोणत्याही मानवी हस्तक्षेपाची गरज भासत नाही.
या प्रकल्पाचे उद्घाटन पुणे पोलीस आयुक्त अमितेश कुमार, अतिरिक्त आयुक्त रंजन कुमार शर्मा आणि Sensen AI चे विजय खुपसे यांच्या उपस्थितीत झाले.
पोलीस अतिरिक्त आयुक्त (पूर्व) मनोज पाटील यांनी सांगितले की, “या प्रकल्पाअंतर्गत 90 दिवसांसाठी फर्ग्युसन रोडवर चार AI-आधारित कॅमेरे बसवण्यात आले आहेत. चाचणी कालावधीनंतर त्याचे डेटानुसार विश्लेषण करून पुढील निर्णय घेण्यात येईल.”
पुण्यात प्रथमच अशा प्रकारची AI प्रणाली रस्त्यावरील वाहतूक सुधारण्यासाठी आणली गेली असून, अधिकाऱ्यांच्या मते, यामुळे वाहतूक पोलीस कर्मचाऱ्यांवरील ताण कमी होणार आहे. यासोबतच नागरिकांमध्ये नियमांचे पालन करण्याची शिस्त निर्माण होईल आणि सार्वजनिक सुरक्षितता अधिक बळकट होईल.
