Sanjeev Sanyal reinstated as Chancellor of GIPE | गोखले इन्स्टिट्यूट ऑफ पॉलिटिक्स अँड इकॉनॉमिक्स (-Gokhale Institute of Politics and Economics -GIPE) ची पालक संस्था असलेल्या ‘सर्व्हंट्स ऑफ इंडिया सोसायटी’ (SIS) ने नाट्यमय घडामोडीनंतर आपला पूर्वीचा निर्णय बदलला आहे. संस्थेने यापूर्वी संजीव सन्याल (Sanjeev Sanyal) यांना कुलपतीपदावरून दूर करण्याचा दिलेला आदेश मागे घेतला असून, त्यांना या पदावर कायम राहण्याची विनंती केली आहे. एसआयएसचे अध्यक्ष दामोदर साहू (Damodar Sahu) यांनी या निर्णयाला ‘गैरसमज’ असल्याचे म्हटले आहे.
सन्याल यांना पाठवलेल्या नवीन पत्रात, एसआयएसचे अध्यक्ष दामोदर साहू यांनी नमूद केले आहे की, पूर्वीचा पदमुक्तीचा आदेश गैरसमजामुळे जारी करण्यात आला होता आणि तो आता ‘निरर्थक’ मानला जावा. त्यांनी यापूर्वीच्या पत्रव्यवहारात उपस्थित केलेल्या चिंतांवर सन्याल यांनी दिलेल्या सविस्तर उत्तराची दखल घेतली.
साहू यांनी पत्रात पुढे म्हटले आहे की, “कुलपती म्हणून संस्थेची प्रतिष्ठा जपण्यासाठी आणि ती वाढवण्यासाठी तुम्ही योग्य पाऊले उचलली आहेत, याची मला माहिती मिळाली असून माझी खात्री झाली आहे. तुमच्यात आणि सर्व्हंट्स ऑफ इंडिया सोसायटीमध्ये योग्य संवाद न झाल्यामुळे हा गैरसमज निर्माण झाला होता.”
साहू म्हणाले की, त्यांनी संस्थेच्या इतर विश्वस्तांशी चर्चा केली आणि सर्वांचे एकमत झाले की यापूर्वी दिलेले पदमुक्तीचे पत्र तातडीने मागे घेण्यात यावे.
विशेष म्हणजे, हा बदल सन्याल यांनी सोशल मीडियावर पदावरून हटवल्यानंतर भूमिका मांडल्यानंतर काही तासांतच झाला. पंतप्रधान यांच्या आर्थिक सल्लागार परिषदेचे सदस्य असलेले अर्थशास्त्रज्ञ सन्याल यांनी आपल्या विस्तृत पोस्टमध्ये जीआयपीईला नॅक (NAAC) मूल्यांकनात मिळालेल्या ‘बी’ श्रेणीसाठी मागील प्रशासनाला जबाबदार धरले. तसेच, त्यांनी पूर्वीच्या नेतृत्वाखाली संस्थेत झालेल्या आर्थिक आणि प्रशासकीय अनियमिततांकडेही लक्ष वेधले.
ऑक्टोबर २०२४ मध्ये कुलपती म्हणून नियुक्त झालेले आणि २ एप्रिल रोजी पदमुक्त करण्यात आलेले सन्याल यांनी सांगितले होते की, जानेवारी २०२५ मध्ये झालेल्या नॅक मूल्यांकनात संस्थेला मिळालेल्या ‘बी’ श्रेणीसाठी एसआयएसने त्यांना अन्यायकारकपणे जबाबदार धरले. हे मूल्यांकन २०१८ ते २०२३ या कालावधीतील आकडेवारीवर आधारित होते, जे त्यांच्या कार्यकाळ सुरू होण्यापूर्वीचे आहे.
एसआयएसने यापूर्वी सन्याल यांना पाठवलेल्या पत्रात शैक्षणिक दर्जा घसरणे, सन्याल यांनी सुधारणात्मक उपाययोजना करण्यात कथित अपयश आणि नॅक मानांकन या कारणांचा हवाला देत त्यांना पदावरून हटवले होते. निवृत्त उच्च न्यायालयीन न्यायाधीश एस. सी. धर्माधिकारी यांची त्यांच्या जागी नियुक्तीही करण्यात आली होती. मात्र, आता एसआयएसने आपला निर्णय बदलून सन्याल यांनाच कुलपतीपदी कायम राहण्याची विनंती केली आहे.
