मुंबई – मुंबई उपनगरात तब्बल १६,३४३ कुपोषित बालकांची नोंद झाली आहे. या पार्श्वभूमीवर मुंबई उपनगर जिल्हाधिकारी कार्यालयात पालकमंत्री आशिष शेलार यांच्या अध्यक्षतेखाली विशेष बैठक पार पडली. या बैठकीला जिल्हाधिकारी राजेंद्र क्षीरसागर, महिला व बाल विकास विभाग आणि मुंबई पालिकेचे अधिकारी उपस्थित होते. यावेळी कुपोषण निर्मूलनासाठी तातडीने उपाययोजना करा आणि १० दिवसांत लेखी अहवाल सादर करण्याचे निर्देश आशिष शेलार यांनी पालिका प्रशासनाला दिले.
मुंबई उपनगरातील एकात्मिक बाल विकास सेवा योजनेच्या पोषण ट्रॅकर अॅपवर फेब्रुवारी २०२५ मध्ये एकूण २ लाख ३८ हजार ९४ बालकांची नोंद झाली. यातील २ लाख ३४ हजार ८९६ बालकांचे वजन आणि उंची मोजण्यात आली. अंगणवाडी सेविकांनी पोषण ट्रॅकर अॅपच्या नोंदीनुसार २ हजार ८८७ बालके अतितीव्र कुपोषित तर १३ हजार ४५७ बालके मध्यम तीव्र कुपोषित असल्याची नोंद केली. या बालकांची राष्ट्रीय बाल स्वास्थ्य कार्यक्रमांतर्गत ऑक्टोबर २०२४ ते फेब्रुवारी २०२५ या कालावधीत आरोग्य तपासणी करण्यात आली. त्यात १ हजार १५९ बालके तीव्र कुपोषित आणि ३ हजार ९६ बालके मध्यम तीव्र कुपोषित असल्याचे निष्पन्न झाले. फेब्रुवारी २०२५ मध्ये अतितीव्र कुपोषित ४५० आणि मध्यम तीव्र कुपोषित ४०७ बालके आढळली आहेत. मात्र, या संख्येचे अधिकृत प्रमाणिकरण करण्यात येत असून मुंबई महानगरपालिकेच्या वैद्यकीय अधिकाऱ्यांमार्फत तपासणी सुरू असल्याचे यावेळी बैठकीत सांगण्यात आले.
